بشير احمد سومرو: سنڌ جو نامور شاعر ۽ نثر نويس بشير احمد ولد صاحبڏنو سومرو، 10 آڪٽوبر 1942ع تي ڳوٺ کنڀڙا، تعلقي اٻاوڙي، ضلعي گھوٽڪيءَ ۾ ڄائو. سندس تخلص ’تعبير‘ آهي. شروعاتي تعليم 1954ع ۾ گونمينٽ پرائمري اسڪول اٻاوڙي مان حاصل ڪرڻ بعد مئٽرڪ 1961ع ۾ ميرپور ماٿيلي مان ڪيائين، ايم. اي (اسلامڪ ڪلچر: 1972ع)، ايم. اي (پوليٽيڪل سائنس: 1975ع) ڪيائين. ان کان سواءِ 1979ع ۾ بي. ايڊ جي ڊگري گورنمينٽ ايجوڪيشن ڪاليج سکر مان حاصل ڪيائين. هن عملي زندگيءَ جي شروعات 04 ڊسمبر 1961ع تي پرائمري استاد طور ڪئي ۽ ترقي ڪري 2003ع ڌاري هاءِ اسڪول استاد جي حيثيت ۾ رٽائر ڪيائين. بشير احمد سومري لکڻ جي شروعات 1961ع ۾ شاعريءَ کان ڪئي. هن وقت تائين غزل، وائي، بيت، ڪافي ۽ ٻين صنفن ۾ طبع آزمائي ڪري چڪو آهي. نثر جي حوالي سان ڪهاڻيون ۽ ڊراما لکيا اٿس. ناز ادبي سنگت، لطيف ادبي سنگت ۽ سنڌي ادبي سنگت شاخ ميرپور ماٿيلي جي ميمبر رهڻ سان گڏوگڏ اهم عهدن تي پڻ رهيو آهي. سندس مرتب ڪيل ڪتابن ۾: (1) ’ساغر مين سمندر‘ (شاعري)، (2) ’رسالو فقير قادر غلام‘ (شاعري) ۽ (3) ’فڪر عدم‘ (شاعري) شامل آهن، سندس ادبي خدمتن عيوض کيس حضور آرٽ اڪيڊمي اوارڊ سميت ٻيا ڪيترا اوارڊ ۽ اعزاز ملي چڪا آهن..
1942.10.10 عيسوي
سنڌ جو نامور شاعر ۽ نثر نويس بشير احمد ولد صاحبڏنو سومرو، 10 آڪٽوبر 1942ع تي ڳوٺ کنڀڙا، تعلقي اٻاوڙي، ضلعي گھوٽڪيءَ ۾ ڄائو.